ओम्रिकोनको त्रास देखाउँदै फेरि सर्यो ‘प्रेमगीत ३’

संसारभर ओम्रिकोन भाइरसका संक्रमित बढेका समाचार आएसँगै विश्वभर फिल्म रिलिज स्थगित हुन थालेका छन् । भारतमा ठूला ब्यानरका केही फिल्मले अन्तिम समयमा आएर फिल्म रिलिज नगर्ने निर्णय गरे । नेपालमा संक्रमितको संख्या उल्लेख्य वृद्धि भएको देखिएको छैन तर पनि भविष्यमा बढ्न सक्ने संकेत पाएसँगै नेपाली फिल्म ‘प्रेमगीत ३’ले प्रदर्शन स्थगित गर्ने घोषणा गरेको छ । निर्माता सन्तोष सेनले सोमबार साँझ छोटो सूचना जारी गर्दै फिल्म अनिश्चित समयका लागि सरेको जानकारी गराएका हुन् । यो फिल्म फागुन १३ मा सार्वजनिक हुने कार्यतालिका थियो । दुई वर्षअघि पनि यो फिल्म कोभिड १९ कै कारण सरेको थियो । यो फिल्म उसबेला नयाँ वर्षको पूर्व सन्ध्यामा रिलिज हुँदै थियो । ‘प्रेमगीत ३’ सरेपछि यो पहिला रिलिज हुने फिल्ममा पनि खतराको घन्टी बजेको छ । दुई पटक सरेर पुस ३० मा रिलिज हुन लागेको ‘चपली हाइट ३’ र माघ १९ मा रिलिज हुन तयार ‘म यस्तो गीत गाउँछु २’ पनि अब सर्ने कि नसर्ने दोधारमा हुनेछन् ।